முதல் காதல்

பனிக்கால
காலை நேரச் சிலிர்ப்பாய்
பட்டென்று நாசி தழுவும்
வாசனையாய்
தொலைதுர பேருந்து பயணத்தின்
அடிவயிற்று கனமாய்
சொல்லிக் கொள்ளாமல்
கலையும்
மயான உறவுகளாய்
கூவாவிட்டாலும்
பிரமை தட்டும்
பக்கத்து மில்லின் சங்கொலியாய்
எண்ணிக்கொண்டிருக்கும் போதே
கணக்குத் தவறும்
கூட்ஸ் வண்டி பெட்டிகளாய்

இன்னும்
விளக்கத் தெரியாமலே
உள்ளோடிக் கொண்டிருக்கிறது
பகிரப்படாத
அந்த முதல் காதல்